అతీతము
ధర్మము సృష్టిని కొనసాగించే కీలు
ఇందులో తప్పొప్పులకు మంచిచెడులకు
పక్షపాతాలకు విచక్షణలకు తావు లేదు
త్రాసు ఒక వైపు బరువుతో ఒరిగినపుడు
రెండవ ప్రక్క చేరు సమతౌల్యమే ధర్మము
పోటెత్తినట్టు అల వచ్చి తీరమును తరిమితే
ఆటల్లె పగ్గము వేసి వెనకలాగుటే విద్యుక్తము
మంచి ప్రబలి విస్తరణతో సంతులన విషమమైతే
చెడుగా పేట్రేగిపోయి లెక్క సరిచేయుటే దాని లక్ష్యము
అటు ఆటు దైవతము కాదు
ఇటు పోటు దానవత్వము కాదు
లక్షణములకు చెందనిదే ధర్మము
గుణములకు సంకోచవ్యాకోచములు సహజము
ఆత్మ నియంత్రణలు తమ పరిధికందని విషయము
మంచి తగుమాత్రముగనే చెడు తగినంత మేరకే
గిరి గీసుకుని మసలే నిబద్దత వాటికి లేవు
ఉన్నంతలో ఇవి ఒకదానితో ఒకటి కలబడి తలపడి
అస్థిత్వము కోసమోనో ఆధిపత్యము పేరుతోనో
సమతుల్యము సిద్ధించు పనిలో సదా వ్యస్తులవుటే వీటి సాధన
మంచి వైపు ఓ పక్క కొండంత అండగ నిలబడు శక్తే
చెడు చేతినీ మరో వంక బలోపేతము చేసినిది
సృష్టికి పరమార్ధము దృష్టే
జరుగు క్రమములో తన పాత్ర నామమాత్రమే
గుణములనే చక్షువులతో శక్తి ఒక సాక్షిభూతమే
No comments:
Post a Comment