నవరాత్రి

వందేమాతరం

తంత్రులు తెగిపడే తీవ్రతతో
సత్తువ సడలకూడదను సంకల్పముతో
సన్నగిల్లే సకల శక్తులూ కూడదీసుకుని
వంటి లోని ఓపికను ఒక్కచోట కేంద్రీకరించి
కెవ్వుమనే కేరింతకి తొలిశ్వాస అందించి
ఆయువు అంకురార్పణకు ఆరాటపడు ప్రతి తల్లీ ఒక బ్రాహ్మిణి

ఎదురు దెబ్బల వేళ ఊరటై నిలిచి
చేవ చచ్చిన చోట చైతన్యము చవిచూపించి
విషయ మర్మముల కడ వివేచనను పెంచి
విచక్షణను పాటించు విఙ్ఞతను నేర్పించి
ఉన్న చోటనుండి సంతు ఉన్నతమును వాంఛించి
పెంపుదల బాటలో వెన్నటి నడుచు ప్రతి తల్లీ ఒక వైష్ణవి

పేగు పంచిన వారికే తెలుసు కడుపు కోత ఏమిటో
జన్మ ఇచ్చిన వారికే తెలుసు బ్రతుకు విలువ ఏమిటో
పట్టి కుడిపిన పాలతో పెరిగి పెద్ద అయి
పంచి ఇచ్చిన రక్తమాంసములతో ఒళ్ళు మదించి
కండ సిరితో మిడిసిపడి కన్ను కానక పేట్రేగు
రాకాసి మూక కడ మూడో కంటితో భస్మించు ప్రతి తల్లీ ఒక శివాని

ఒక్క మూర్తిలో మూడు రూపాలు, ఒకే గుండెలో మూడు భావాలు
వందే త్రైమూర్త్యాం మాతరం, వందేమాతరం